1. Schuetag

So, höt eschs so wit gse, mi erscht schuetag sitmeh as 10 johr, zom glöck muess eg das ned wörklech au tag me mache. d cathy (Sorry, ha dr name aube fausch gschrebe, entschuldigung der redaktion....) het me höt am morge i d schueu brocht gha. Mer hei a dr bushauteschtöu aghaute, ond se het mer gseitwenn as morn dr bus fahrt, eg chönnt öu dr zog ne, aber dr bus esch haub so tür, het mer die am bahnbilletschauter gseit. auso beni i die schueu. eg ha a dr reception müesse e zettu us föue, met dr wohnadrässe, mailadrässe ond dr tel nommer, do eg jo e nöii nommere ha, ha neg ke ahnig gha wie die esch. das hani dere a dr reception gseit, die het mi us- oder aglachet, eg has ned tschegget. de hani bi ehre müesse ufs reception büro alüte de het si mini nommere gse gha, ond se mer chönne diktiere.... Super martin... Nochär esch e begrüessig gse met de nöie Lüt, wo höt serschte mou i die schueu si, mer si grad emou 5 gse. 1 Italiäner, dr jackomo, 1 französin,la belle mirlenne...., 1 japanere, ke ahnig wie dere ehre name esch, ond 1 schwizere, nome s absolut domme esch, dass eini vom tessin esch, ond die kes wort schwizerdütsch cha. Itäm, de hei mer e tescht müesse mache, met wörtli ine schribe, luege weli zitform das passt, de hesch 4 verschedeni möglechkeite gha zom a chrützle, es interwiev hani no müesse ge, dass si gsei wo asi schtoh met mim englisch. Es get 6 stufene i dere schue. s 1esch dr afänger, ond s 6 s beschte, osser för s 1 si aui no i drei witere abschnette ongerteilt, ond au 4 woche gets e tescht, wenn dä beschtohsch, stigsch eis ufe, ond eg ha höt i däm tescht(oh wunder, 2 johr scheidegger ond 16 rämu hei mer glich meh brocht, weder as meg je erdänkt ha....) is 2.3 brocht, das heisst eg ha nöchscht woche scho weder e tescht, ond wenni dä beschtoh chomi is 3.1, ned schlächt oder??? för föteli hets höt leider ned glängt. ébrigens die angere si aui onger mer, osser dass vom jackomo weissi noni, dä esch am nomitag scho i d schueu, mer hei das lo si. auso, CU