Achtong fertig los

Eg be am donschtig morge, no es letschts mou i d stadt, ha e nöie internet stick müesse ha, dr aut hani ufbrucht. nochhär beni met em taxi zom zom travel car centre, dörte hei si mi scho erwartet, de hei si gfrogt du besch doch öu scho do gse, met em ne kolleg, wo emmer so komisch/loschtig glachet het, de hani gseit jo vor vier johr esch das gse, ond dä kolleg heisst rämu... Eg be de schnäu go nes probefährtli mache met eim vo dörte, ond nochhär eschs scho los gange, eg elei zmetz dor stadt, eg be säuber öberrascht gse wie guet as das gange esch, eis einzigs mou hani z schpot gmerkt dassi links hät söue abbiege, aber wöu die stadt relativ jong esch ( auso cheschtehouz esch öbbe drü mou öuter, mer met öisne 700 johr) esch si so schachbrätt mässig ufböuet, de gosch eifach bi de nöchschte zwe chrüzige links ond bi dr drette rächts de passts weder. Aber so rechtig los gange eschs erscht geschter. POTZ HEIHEIHEI. eg ha jo eigentlech i rechtig süde wöue, am afang esch das jo glöub no dr fau gse, be am hauptbahnhof verbi ond de ofsmou beni weder zmetzt im chueche gse, eg säge öich zmetzt drenne. de so haub ufere öutobahn, ha nöme chöne dräie, de hani no mou öbber die blödi huere harbour bridge müesse ond eg be in north sydney gse, dört kehrt ond zom zrog fahre beni dore harbour tonnu, dä eschauso ganz,ganz spezieu, dä muess me eifach gse ha, sösch het me e böudigslöcke.... Nochhär beni de ändlech i die rechtigi rechtig gfahre, ond ha so ne pacifik road gno, abartig vöu lüt hets gha ongerwägs. de hani gschweng a ne beach wöue go, me het öbbe 5 km müesse fahre vo dr höuptstrosse, eg be gange, aber de eschs abe ond ofsmou hets e kollone gha, de het s lämpli no afo lüchte vom tank, hani auso weder omkehrt. ha jetzte müesse e tankstöu sueche, eg be gfahre ond gfahre ond gfahre, tankstöu esch keni cho, de ändlech nach öbbe 20 minute esch eini cho, aber die esch ned gloffe, de witer gfahre ond nachere viertu stong weder eini gse, out of order hets gheisse, ha scho langsam aber secher fasch e chli sorge gha, aber eg säbe jo emmer läb ohni sorge, dass hani de öu gmacht, de ändlech nach öbere stong benzinlämpli lüchte die erlösung, ond moscht esch ine wie ne more... e zäutplatz hani de öu gfonge, aber dr igang ned, aberzom glöck het mis natel gps navigation ond au dä seich, eg ha ne auso doch no gfonge. zom znacht hets geschter ganz e feine thon mais salot ge, es esch jo schliesslech karfritig gse, ohni scheiss, be jo schliesslech katholisch. höt am morge hani de met batmans bay beach ressort telefoniert gha ond de e platz för höt reserviert. höt esch d fahrt weder sidefin abgloffe, keni witere problem hets ge. jetzt machi de znacht, spaghetti met ere rassige sauce ond e chli späck ond schinke denne.